1 Corinthians 14

Xavi sou Palomatana Mo Vaikala Iouvilemo

1 ^aLa sou ngamulinu vote'i sou tanutanuxu mo ngamasaxau xavi iouiou sou i'oxonu xaixai noxou Uleenu Tavuna ne u'oki. Laixe lexe ngano'u xavi sou palomatana. 2Xo itema ane uvivikala no anu vaikala iouvilemo ne uvivikala noxi'a ta mitema uasi ia noxou Latauasi. Xo itema vile ulavusou mii e anu ulelemolu ne uasi. Anu ua'aloxu mimii mutalume ne no anu uleenusi. 3Ia ta mitema ane'i palomatana ne ivivikala ulai noxi'a ta mitema sou ane'i ileme pekia'a mo ipeletotone'i xe i'oxonu opone'i uai laixe. 4Anu ane uvivikala no anu vaikala iouvilemo ne anu usu'ulinu anusisi. Ia anu ane upalomatana ne anu usu'uline'i ta mitema ilotu noxou Iesu sou ileme. 5Eni emasaxainge vilevilesi ukalusi lexe ngavivikala no anu vaikala iouvilemo ia emasaxa mu'oki lexe ngingi ngapalomatana. Anu ane upalomatana ne anu tila mo muaulixu anu ane uvivikala no anu vaikala iouvilemo. Ia laixe lexe anu uxiunu vaikala ne mo sou ta mitema ilotu noxou Iesu ukalusi ne ino'u su'uli no anu la ileme.

6Ioxe ta vivilo noxou Iesu, lexe eni ane'e noxinge ia avivikala no anu vaikala iouvilemo la eni asu'ulingengi laixe a loxovaa? Mo lexe eni a'alomengi no 'a mii ma'ia mutalume ia apala'alixu mo lavulavu laixe xe vaikala palomatana la alosinge vaikala sou usu'ulinu. 7Mo loxo mimii ane mauli no anu uasi ia tamaxusi, loxo kita xe susapu ne ta mitema imomomo sou ilavusou lexe ma'ia ane ilelexe no anu ne a loxovaa no mine mimii ne tamaxu vitanisi. 8Mo aloxo ne la lexe xolalau utama lamana uasi, la 'ena'ei ane uloo sou 'oto'oto? 9La sou anu aloxo nesi noxinge, lexe ngingi ngavivikala no anu vaikala ane ta mitema ilavusou uasi. La ane'i ilavusou mii ane ngingi ngalelemolu ne a loxovaa? Anu aloxo ngingi ngevivikala ne mulai no nixi vitanisi. 10Manina vaikala tapiena iouiou anu a uxolu no anu lialia 'o, ia vile noxi'a ne laaxu uasisi, uasi. 11Ia lexe eni alavusou vaikala ane itema vile uvikala no anu ne laaxu uasi, la eni ne aloxo aasila noxou itema ane uvivikala ne xe anu ne aloxo aasila noxilo. 12La sou anu aloxo nesi noxinge. Xo loxo ngingi ngemasaxa mu'oki sou ngano'u xavi iouiou sou i'oxonu xaixai noxou Uleenu Tavuna. La ngatovo ngaxaxai pekia'inge sou ngano'u xavi ane usu'uline'i ta mitema ilotu noxou Iesu sou itulu pekia'a mo ileme. 13Mo tava'u aloxo ne la sou itema ane uvivikala no anu vaikala iouvilemo ne ukilaka lexe anu umomomo sou uxiunu vaikalasou mii ma'ia ane anu mulemolu ne. 14La sou lexe eni akilaka no anu vaikala iouvilemo la uleelelisi a ukilaka io xavutalaxeni ne umaxa'u nene'axu lakilakaxeni ne uasi. 15Ioxe la sou eni a'oxonu mii ma'ia? Eni akilaka no anu uleeleli mo no anu xavutalaxeni kalumo xe eni alexe lexe no anu uleeleli la no anu xavutalaxeni kalumo. 16Ia lexe nini naitinu ualasou Lataua no anu uleenenisi mo navikala laixe musuku la sou itema vile vitanisi ane uxolu no nixingengi ne ulavusou uvikala lexe manina a loxovaa? Xo anu ulavusou mii ma'ia ane nini nalelemolu ne uasi. 17Male nini navivikala laixe noxou Lataua ne anu laixe ia itema ane vile 'olele ne anu uno'u su'uli vile uasi manina. 18Eni avikala laixe noxou Lataua xo euaulingenge mukalusi sou avivikala no anu vaikala iouvilemo. 19Ia no mine ta mitema ilotu noxou Iesu ipita la laixe lexe eni avikala no anu vaikala mautunu ta'uvesi ane ulamana xe eni avikala sou ane'i ino'u lavulavu no anu, io anu tila no anu vaikala 10,000 mautunu vaikala iouvilemo.

20 ^bIoxe ta vivilo mamu sou xavutala-mengi loxo ta molomolo ta kitukitu'a. Ia ixavutala no anu 'ilixo masumasua la ane'i loxo ta keakea. Xo ta keakea ne ilavusou i'oxonu 'ilixo masua uasi. Io no anu xavutalamengi la nga'oxo aloxo ta mitema ta tatila. 21 ^cXo kaukavu muai no anu lapuloto aloxo 'o,

“‘Noxi'a ta mitema sou vaivaikala iouvilemo mo no anu anaxa'a taasila,
la eni avivikala noxi'a ta mitema ane ne, eni a'oxonu aloxo ne.
Ia ane'i imomomo sou ilomu noxilo uasi.’ Tila muvikala aloxo ne.”
22La sou vaikala iouvilemo ane loxo sosovo ne anu noxi'a ane'i ane imulaxu tane'i uasi, ia noxi'a ane'i ane imulaxu tane'i uasi. Xe vaikala palomatana ne noxi'a ane'i mimulaxu tane'i. Ia ane'i ane mimulaxu tane'i uasi ne ane'i uasi. 23 ^dIoxe lexe ta mitema ilotu noxou Iesu ipita io ane ukalusi ne ivivikala no anu vaivaikala iouvilemo, ia ta mitema mose'i ane ilavusou vaivaikala ne uasi xe imulaxu tane'i uasi ne ilomusinge la ixavutala lexe ngingi xavutalamengi mu'oxo vulusi. 24 ^eIa lexe ngingi ngavikala palomatana io itema vile ane umuxaxu tanu uasi xe vile ane ulavulavu uasi ne u'una, la vaivaikalamengi ne uxiu opoonu xe ulavu lexe anu itema sou susu la ngingi ta piena ukalusi ne ngailevinu 'ilixou ne, 25la sou mii ane mutalume no nano no tanu ne anu a uai no tatexa ne. La anu utaloxo ulu'e sou ulotu noxou Lataua, la uvikala tama lexe, “Manina, Lataua anu a uxolu no nixingengi 'o.”

Vote'i sou Muamua'ixu Lalotu

26 ^fIoxe ta vivilo nenge tavikala a loxovaa? No mine ngingi ngane'e ngapita sou ngalotu la vilevilesi ne ino'u xaixai loxo lexe, xe vaikala sou lavulavu, mo mii mose'i ane Lataua mumaxa'u no iengi xe vaikala iouvilemo. Mo ane sou uxiunu vaikala iouvilemo. Mimii ane ne sou u'oxo lalotu utulu pekia'u mo uleme. 27Lexe mose'i ivivikala no anu vaikala iouvilemo, xe tamei uasi la tatalusi ane'i ivikala, io ivikala ukeikei uasi, vile uvikala ukalu la vile uvikala. Xe laixe lexe itema vile sou uxiunu vaikalai'a ne anu a uxolu kalumo. 28Ia lexe itema vile sou uxiunu vaikala ne uasi, la itema ane uvivikala no anu vaikala iouvilemo ne, uxolu tani ukisi no anu pita sou lalotu ne. Io uvivikala noxousi xe noxou Latauasi. 29 ^gMo sou ta mitema sou palomatana tamei, uasi la tatalusi ane ivikala, io ane'i ane ixolu ne ilomulangiou mo iilevinu vaikalai'a ne laixe manina. 30Ia lexe Lataua ulosou itema vile e uxoxolu no lia ne mii vile la itema ane muvivikala tei ne anu utalo. 31Xo ngingi ukalusi ne ngemomomo sou ngapolomatana vilevilesi mo sou ta mitema ukalusi ne ilamana mo pekia'a. 32Ta uleenu sou vaikala palomatana ne ane'i imulinu vaikala noxi'a ta mitema sou ipalomatana nesi. 33Xo Lataua ne loxo anu Lataua sou u'oxonu mimii vitavitanisi uasi, ia anu Lataua sou opo se'isisi.

Loxo no anu la'ola'oluxu noxi'a ta mitema ilotu noxou Iesu, 34 ^hmo ta sema ne ixolu tani ukisi no nano no a lalotu. Ane'i ne imomomo sou ivivikala uasi ia ilu'ene'i sou imulinu loxo lapuloto noxou Mosesi mulemolu. 35Lexe ane'i imasaxa sou ilavusou mii vile, la ane'i itali'isi'a ta mului'asi no taasi'a, xo ta sema ivikala no nano no 'a lalotu ne anu mii sou maela manina. 36Loxovaa vaikala noxou Lataua ne tava'u musoko a noxinge ne? Uasi, loxovaa ngingi ta mitema ane nesi ane ngeno'u vaikala noxou Lataua ne? Ia evile ino'u vaikalau uasi.

37 ⁱMo lexe itema vile uxavutala lexe anu ne itema sou palomatana, xe uasi la muno'u xavi iouiou sou i'oxonu xaixai noxou Uleenu Tavuna ilavusou lexe mii ma'ia ane eni akaukavunu ulai noxinge 'o ne anu loxo vaikala pekia'u noxou Tila. 38Ia lexe anu umulaxu xavutalau no anu uasi, la anu kalumo ne ngamulaxu xavutalamengi no anu vaikalau ne mamu. 39Anu aloxo ne la sou ta vivilo nga'oxo masaxa noxinge pekia'u sou ngapalomatanasi, io vaikala iouvilemo ne ngatavuna sou mamu. 40Ia nga'oxonu mii ukalusi ne umomomo laixe no anu vote'i sou muamua'ixu lalotu.